Stemme: Snachs als een ieghelijck was in rusten, &c. ALs lest den hellen glans der sonnen Begost te lichten het aertsche pleyn Heeft Phylomela daer begonnen Constigh te rooren sijn becksken cleyn Ende Cupido heeft seer wel Ghespelt daer een droef-eyndigh spel Soo dat mijn rust // door ooghens lust Ghebroken wert door t'drooms ghequel.
Mercurius quam neder-daelen Met tijdingh vanden donder heer Die brack door Phaebi helle straelen Met ander veel Goddinnen meer
Quaemen naer t'aert uyt hemels licht // Om te sien t'spel van dit cleyn wicht Dat daer seer stout // aen haer voor-hout Hoe dat de liefde haest verflout.
Hoe dat Virenus stil wech raeckten Van sijn liefste, eersten bemint En hoe hy haer door list ontschaeckten Daer naer tot vluchten was ghesint Sijn trouweloos bestier hem joech Ter zee waert in en met haer loech Smeet haer terstont // in't sorghens gront Waerom sy haeren druck bemont.
Waer sijn mijn lommer wite deuchden Mijns maeghdoms bral vervloghen toch Die aesden uwe boose vreughden En vorsterden u vals bedroch
De onbedachtsaemheyt in't schael Van het verdriet haer brocht in quael Want was ghepluckt // en afgheruckt Haer maeghdoms tack ende verdruckt.
Olympia bleef niet verborghen Met ancxt ghevoeydt werdt haer ghenucht Haer hert ghespijst wert met veel sorghen Ende met vrees den yversucht Waerom de liefd' lockten haer me Ras naer den oever vande Zee, Haer siele wert // besproeyt met smert Virenus scheurden schier haer hert.
Sy cost dees liefde niet ontvluchten Wou sterven inden seeschen gront Want veele pijns ghevoeyde suchten Dreef uyt haer aedem loosen mondt
Om dat de min list gierich haer Verwon, en brocht in groot misbaer Door dit quaet stuck, heeft t'ongheluck Aen haer ghebrocht veel pijn en druck.
PRINCE.
Hadde Olympia gheen reden Princen, te suchten om dit feyt Die eerst met soetheydt was bestreden Daer naer ghebrocht in swarigheydt Daerom was sy van goeden sin Te sterven door Vireni min Mint met verstandt, dat niet en strandt, In u de liefde' en overmandt. FINIS.
Cookies on Poetry Cove