Stemme: Hansken ons ghebuermans soon, &c. EEn man die veele sorghen heeft Den heelen dagh En daer by in veel vreesen leeft Wel suchten magh Men heeft hem niet te vraghen Naer claghen Wat meerder pijn // cander toch sijn Als t'wijff de broeck wilt draghen
Ick heb een vrouw waer ick haer quijt Sou sijn heel blij Dan mocht ick eens met groot Iolijt Gaen drincken vrij
Nu moet ick sitten hucken En bucken Ick schuer, ick veech // ken ben noot leech Ick werck mijn hert in stucken.
Wat dat ick doen, nochtans altoos Sy druyven perst Blijft even trots, quaet, ende boos Ende schier berst Als ick eens mijn ghebreken Wil spreken Als de pap brandt // sal sy met schant Op my soecken te wreken.
Ick draegh voorwaer wel een groot cruys Met mijn quaet wijf, Come ick savonts niet vroegh t'huys Hoor ick ghekijf
My met onghebrant asschen Sal wasschen Als ick laet // ben op de straet Sy my haest comt verasschen.
Daeghs is sy soo schoon opgheset Als een princers Snachts is sy als een palinck spet Oft tooverers Altijdt sal sy my clachten Verachten De kinders moet // ick armen bloet Wieghen met heele nachten.
Comter somwijl een ander gast Sy hem belonckt, Als ick lijde veel overlast Haer hert ontfonckt
K'en mach t'ghelt niet bewaeren Oft spaeren Heel daghen drinckt // ende sy schinckt Den wijn met haere kaeren.
Als sy is droncken ende sat Dan comt den pol Ick wercke my gans moe en mat Met kaken hol Wil ick haer yet verwijten Sal crijten Van haet en nijt // gramschap en spijt Altijdt my dreyght te smijten.
Die langh gheribde prij my sal Costen de doodt Want mijnen druck en ongheval Die is te groot
K'en sal niet langher leyden Moet scheyden Uyt dit gheschil // daerom ick wil My tot den crijgh bereyden.
PRINCE. Princen de waerheydt twisten baert Als ghy uyt geck V lieve vrouwen maer verclaert Haer quaet ghebreck Daerom den last wilt mijen Die vrijen V wel versint // eer ghy beghint Want veel verdriet moet lijen. FINIS.
Cookies on Poetry Cove