Stemme: soo t'begindt.
WOrdt ghy vermeestert vanden wijn
Ick raed' u wilt gheen minnaer sijn
Want die den dranck aengaen
Kiesen licht verkeerde baen
Door t'minnen // de sinnen
Eysschen een rijp verstandt
Waer door den minnaer brandt
Voor t'hert // veel smert
Verkiesen
T'berouw doet de vreught verliesen.
Den dronck, een oorspronck van veel quaet
Wijst Cupido verkeerde straet
En drijft de heete min al door
Gheeft den mensch een quaede spoor
Doet lieghen // bedrieghen
verweckt veel vuylen lust
Gheeft het hert veele onrust
Sal terstont // tot de sondt
Verwecken
Den mensch // en vande deucht trecken
Den Edelen wijngaert ranck
Die schiedt nu sijn scheuten lanck,
Daerom sijn vruchten pluckt
Ende vande tacken ruckt
Laet vaeren // t'beswaeren
Ende verdriet
Want den wijn den druck verbiet
Laet ons singhen en springhen
Vrolijck sijn
Stort nu uwe maech vol wijn.
FINIS.