Op de vvijse: Ma passion seriez bien lasche, &c. HOort nu de potten en pannen klincken Al watmen siet nu ter herberghen gaet Sy loopen soo sat en vol van drincken Sy weten qualijck waer Godts kercke staet Verwecken alle quaet. Men hoort nu rasen heftich tieren Een yeder roept den sot uyt sijne mouw
Hier hoortmen dansen daer sietmen swieren Hier eenen droncken man en daer een vrouw Waermen comt roockt de schouw.
Door vele sonden haer straf vermeeren Door de ydele vasten-avond vreucht Yder hem cleedt in oncuyssche cleeren Wiemen siet hem inde sonden verheucht Men denckt niet p de deucht.
Sy woorden gheeert die t'best uytvueren Ende die sonder maet scheren den sot De gene die t'lanck can houwen duren Ende viert sijnen buyck als eenen Godt Die t'beste met deuchden spot.
Ghemaskert over de straten loopen D'een eenen duyvel d'ander eenen geck
En weten luttel dat sy vercoopen Haer siel die slinckt voor Godt als vuylen dreck Besmeurt met sondens vleck.
Hier hoortmen vele ghenuchten bedrijven Spelen, vloecken, en tuysschen, met de kaert Daer sietmen seer vechten ende kijven Alwaer dat wordt veel haet en nijt ghebaert T'gheen haere siel beswaert.
Het goet dat moeten sy nu verteren Al waeren sy daechs daer nae sonder ghelt De kinders t'huys tieren ende beren Sy toonen nu al haer onnut ghewelt Den dronck haer neder velt.
Wilt yemant aen haer de sont doen vluchten Sy achten dit voor groot en hatich spijt In woorden met veel onsuyver cluchten
Dat niet verbiedt den Vasten-avonts tijdt Soo dat Waerheydt baert Nijdt. FINIS.
Cookies on Poetry Cove