In N. Plantae Mauritiadem.
PLantarum memoranda seges comitatur ab imo
Vespere victoris tempora Mauritii.
Fas erat Americae perarantes viscera terrae
Totum Nassavios subdere Vesputium.
Evellenda fuit stirps cum radice subactae
Telluri, ne non tota subacta foret.
Barbara frons fronti Batavae collecta coronam
Implicat & lauri perpetis instar habet.
Currite ad haec avidi nostrates dona Galeni:
Gratior aspirat naribus aura meis.
Appulit has inter plantas his floribus, hisce
Fructibus in Patria nunc quoque Planta virens.
Appello Hippocratem: dicet convictus, Eoas
Inter & Occiduas non habet ista parem.