Ad I. Vander Burgh, Aperto aggere Merkae fluvii, post expugnatam Bredam.
PRima coronavit Bredanos Flamma triumphos,
Cum fera stramineas induit hasta faces.
Proximus elisis crepitavit ab Ignibus aether;
Dixeris aestivâ nube tonare Iovem.
Functa est officio Tellus, cum sulphur & unà
Carbonem & petrae contulit una salem.
Restabant Undae, restabant signa fluentis
Laetitiae per, queîscunque natatur, aquas,
Tandem Naturae signo dato, & obice rupto,
Vasta manumissi Fluminis pora patent.
Applaudit cataracta Duci, tolluntur in altum,
Praecipites lapsu quo graviore ruant.
Et postliminio reduces Bredana lebete
Excipit & Nymphis nubit amica Ceres.
Euge, pater venerum, siccos aqua ducit in urbem;
Si me, si Bredam quaeris, habes comitem.
Carmina scribuntur vel aquae potoribus, ipsa
Hordea, sed lupulis vincta, Po|esis amat.
Quin, si multa fidem Bredae cortina meretur,
Hoc est Pegasei fontis ἄριστον ὕδωρ.
I bone, quo tua te sitis evocat, I bone Burghi,
Tota natat festo festa liquore dies.
Euge, vola: qui pontus erat, jam manè, frequenti
Teste, tot in testis vespere potus erit.