In Thesaurum librorum à I. Golio ex Oriente in Patriam allatorum, quo tempore Classem Hisp. P. Heinius occupaverat.
QVaeritur, & vario nuper sub judice lis est,
Utra Batavorum gloria cedat utri.
Heinius occiduo detraxit vellus Ibero,
Eoï spolium Golius Orbis habet.
Heinius interitum, turbatâ sorte, minantes,
Golius aeternas per freta vexit opes,
Heinius in paucos ducit sua munera rivos,
Participes omnes Golius ore facit.
Felicem Patriam, quae se praedives utrimque
Nescit utrâ potius prosperitate beet!