In effigiem Christinae Reginae Sueciae.
NOn haec Paphi Regina, nec Saturnia,
Nec saltuum potens, nec armorum Dea est,
Nec Mars Gradivus, nec tonans Diespiter,
Nec Cynthius, nec ales Atlantis nepos,
Nec de minorum gentium turba Deus:
Sed instar una est omnium. quid amplius?
Omnes Dii est, omnes Deae. quid amplius?
Septentrionis horror est, Austri stupor,
Amor Occidentis, Orbis Eoï pudor,
Sol alter & Coeli & Soli. quid amplius?
Christina Rex. quid amplius? Gustavia est.