Barlaei, Ad Tesselam, cum fraga illi mitteret.
TEssela, fraga tibi mitto sapidissima, sed tu,
Tessela, plus fragis ingeniosa sapis.
Tessela, fraga tibi mitto dulcissima, sed tu
Dulcior his fragis crederis esse mihi.
Tessela, fraga tibi mitto fragrantia, sed tu,
Tessela, tot fragis suavior hospes oles.
Tessela fraga tibi mitto plus mille, sed insons
Tessela, pro fragis millibus una satìs.
Tessela, si fragum fieres; tunc Tessela posses
Proximior labris tangere nostra tuis.
Tessela, que mitto, sunt fraga salubria, nam tu
Tessela sollicito sola medela mihi es.
Tessela, si fragum fieres, tunc Tessela, possem
tangere Tessalicas, sed sine bile, genas.
Tessela si fragum fieres; tunc optima posses
In succum verti Tessela tota meum.
Si tecum hoc fierem; tunc, quae miracula! posses
Tessela Barlaeum saepè vorare tuum.