In Incendium, quo Hagae Templi Aulici tectum conflagravit, Cal. Feb. cIɔ Iɔc xʟɪv. triduo post natalem Principis.
AVriacis iterùm natalibus assecla, caro,
Dicimus, an charo fulgurat igne dies.
Excipit illustrem cum plausu Patria casum,
Et fabricae tanti tantula damna putat:
Nec sic damna quidem. quid enim? Laquearia Templo
Coelitùs immissae diripuere faces?
Ergo, quod injungit Pietas, jam vertice nudo
Stamus: id officii novimus esse sacri.
Et sacra sub dio facientûm libera Coelo
Vota suus fervor, lumen & aura vehent.
Audiet Auriacis longos natalibus annos
Poscentes demptâ sic quasi nube Deus.
O ego sim vates; ô ut, sine crimine nostro,
Impediant Patriae sidera sola preces!