Ad Amplissimos Hagae Rectores.
VNanimes (non jam Pagi) magnae Urbis Epoptae;
Ordo decens patrii, prime, sacerque soli;
Quorum perpetuis nova se, nova rursus, & usque
Grandior & curis debet & auspiciis
Haga domus Divûm, seu quis mortalia, seu quis
AEstimat aeternas, numina nostra, Deas;
Sumite non duri, vestra de gente Poëtae
Edita non duris verba Latina modis.
Quam fari doceo, docuit me Patria fari:
Debuit has illi patria Musa vices.
Nec venit in partem vestri ambitiosa laboris:
Vestrae laudis erunt marmora, verba meae.
Quis scit an extensae concedent fata sonorae,
Haga loquax melius vivet, an Haga silens?
Aucta, nec invideo, vobis auctoribus esto,
Coeperit Hugenio dum praeeunte loqui.