Vincentio Fabricio, Medicina Candidato, Poetae. Ab exercitv.
QVi me inter arma, Nordovix, novenarum Mystes Dearum, non novelle, non prisce, Sed sic utrumque, ut utrum sies, parùm constet; Puer diserte, non puer, vir imberbis, Qui me inter arma, non inermibus chartis, Sed de pharetra maximi Deûm telo, Telo Merillae fulminum, gravi telo, Ignotus ignotum feris, & invisum, Mox invidendum, laureate Fabrici, Sed inter ulnas educantium, ad cunas, Et ante cunas laureate Fabrici; En dexteram, fidemque, si quid hoc tanti est, En pectus imum, & intimum, en amicorum Esto meorum; per fidem, per hanc dextram, Per Heinsium, commune nomen utrique, Commune numen, crescet ille crescenti Coaevus aevo, fixus, acer, aeternus, Par ardor illi, quem fovetis utrimque Fabricius Merillae, & illa Fabrici. En arte Coâ prorsus & Galenorum Caeco apparatu, quo magìs meus fias, Nihil necesse est. Vixerit senex Cous, Fac totus in te vixerit (quod ut cano Fiat, mereris jam puer) quid expectem, Nisi ut propinquis aeger à manu tanta Reddar, quod orto Parca neverit, vivam, Et sim diù, qui nil quidem interest an sim? At qui sepulto cespitum gravi mole, Gravioribus negotiorum, & armorum Ni Patriae, nec Principi, sibi extincto, Surdo, silenti, nescio Camoenarum, Permessidos, Pindi, tui, sui, trunco,
Vitam remittis, & procul jubes vivam, Loquar jubes & audiam, jubes cantem, Permessidem credam facis, facis Pindum Colles cruentos, & sororibus divis Quasi interesse, qui sororibus diris Quàcunque vertor, aut revertor, intersum, Cujus Galenni, cujus è Deûm turba Potentiorum, τῶν μὲν ἰατρευόντων, Manumque, opemque, magne tiro, non vincis? Me coecus error, me profunda caligo Involvit, aut mortale non facis factum, Qui me inter arma, Nordovix, novenarum Mystes Dearum, neminem, nihil, nutu Novum creasti, nempe recreavisti.
Cookies on Poetry Cove