In monumentum Reipub. Venetae, quod de Alexandro III. Pontifice adversus Fridericum I, & Othonem filium Anno cIɔ Iɔ c lxxx iix. eximiè merita esset, à Pio IV. Pontifice erectum, ab Vrbano IIX. deletum.
VIcto Quiriti Barbarossa calcatus,
Victore Marco, innotuit fide longâ
Tradentis aevi; nulla grandis exempli
Pondus vetustas, livor, ira concussit.
Nunc ipsa veritatis umbra non fertur;
Fit vis tabellae, iniqua nunc manus, quod pes
Olim superbus Caesari, facit telae,
Telae innocenti: ingratitudo delevit,
Quod saeculum nequivit, & dies, ulla
Dies nequibit. Christiane, si nescis,
Papâ docente jam scies, quid intersit
Terrena virtus Coelicae: quod extruxit
Pietate Roma, Vrbanitate destruxit.