In gratiam Professorum Academiae Groninganae, ut pro dignitate vestiantur.
PAllia Doctores! ubi fas, ubi sacra decori
Majestas, vel ubi denique justitia est?
Pallia Doctores ornant? sine syrmate Musa
Quaerit ubi nudos condat honesta pedes?
Tolle gravem Diis & patriae de corpore naevum,
Corporis augusti Diva, Groninga parens.
Non faciunt nec equum phalerae, nec purpura Regem,
Nec pars militiae creditur esse sagum:
Sed faciunt ad equum phalerae, nec purpura Regi,
Nec bellatori pondus inane sagum est.
Ipsa aliquid natura parens quod inutile dici
Non ferat, ornandis rebus ubique locat.
Barba viri decus est, pulchra est de vertice fusi
Virgineo ad talos unda capillitii,
Tolle mihi fasces, Academia, tolle cathedras,
Aut quo de populo non habearis habe.
Denique si nullis vinco rationibus, audi
Hoc unum, & Patriae quam potes affer opem:
Tota, vides, odiis ardet civilibus: ut sit
Arma cui possint cedere ,sume Togam.