Ad Tessalam, de Barlaeo Monitum.
TEssala, tot monitis toties de fraude Poëtae,
Nunc quoque de insidiis certior esto novis.
Ille tuos montes, & quae quasi penè Gigantum
AEmula, non unâ robora rupe locas,
Ille tuos laudat Fontes, ille antra deabus
Commoda, & hac propter non odiosa Diis?
Crede mihi, quod in ancipiti gladiator arena,
Quod nudo liber vertice Falco facit,
Aut Aquila, aut serpens Epidaurius, omnis ab illa
Gente, licet probitas emicet ore, facit.
Non feriunt quo collimant; quod lumine laevo,
Non est semper idem, crede, quod ungue petunt.
Ille tuas, Rhetor, latebras sacrosque recessus
Praedicat, aut lucos ille, Poëta, tuos?
Tessala diffide; est viduae, est soli quod in aurem
Inspiremus, & hoc pondus in augurio est:
Non it eò nequam quò se vult ire videri:
Hoc agit? hoc ergo non agit. Hoc agitur:
Si dubitas, en quantus ego, quem respuis, auctor,
Quàm potior monitis cautio nulla meis.
Ut meliùs furem nemo quàm fure revelet,
Optimus agricolae censor ut agricola est;
(Me quoque Pastores vatem dixisse memento)
Haec ego de fucis ipse Poëta loquor.