Susanna van Barele, Vxor Hugenii ad Barlaeum.
‘QVae de virtutum serie fortissima virtus,
Claudier heroo non satis apta pede,
Fornicibus tonat alta cavis; ubi pulpita Doctor
Igneus Herculeo, dixeris, ore quatir,
Supremis habitasse labris convicta docentem
Pallida, si quatiant ventus & unda, fugit.
Eluit unda, efflant Zephyri quod ahenea dicas
De bis ferrato prodere verba sinu.
Sic studiis impallescunt? hos barba tremendi
Fulminis, hos animos sub gravitate fovet?
Cessit palla togae; poterit toga cedere pallae,
Et mea semimares stringere vitta comas:
Quin jam laurigerae scandent subsellia matres,
Et nova doctorum foemina doctor erit;
Vel facere instituant quae se docuere suosque,
Vel quae non perimant facta, docere viri.’
Tam fera Barlaeo Mater Barlaea paventi
Scommata, non ego, ne decipiare, dedit.
Placasti, confesse, Jovem: magis ardua restat
Pugna, satisfieri nunc sibi Juno petit.