Ad Illustrem Brederodium, in nuptiis Sophiae Filiae natu maximae Cum Barone Christiano à Dona.
INgenium, ingentes animi, splendoris aviti
Stemma, viro dignae & Borusso milite voces,
Factus ad imperium vultus, captura Dionem
Lumina, trux lepor, acre decus ridentis ocelli,
Majestas & amor, calor & prudentia, forti
Melle joci, sale condîtus sine crimine sermo;
Omnia concurrunt & in uno singula ephebo.
Illustris Batavûm sanguis, Brederode, Deorum
Indigetum praeclare nepos, agnosce benigna
Fata tuae, non hoc donum, dare dona Sophiae.