Ad Ioannem de Sancto Genesio, Avenionem.
SAngenesi, quem fama diù virtutis amicum
Et Batavis sanctum fecit & Hugenio,
Quae mea porrecto speciosè pendet ab hamo,
Crede mihi, tacitis non caret esca dolis.
Praeda spei caput & lucri nativa cupido est.
Si nescis, Batavi turba marina sumus;
Pisciculis grandes venamur in aequore pisces:
Grandibus haec ipsa it piscibus esca tuis.
En ego praemonui: cum fraudatore Batavo
Res tibi, si caperis, sed sine fraude fuit.