In M.F. Langreni Σεληνοδασμόν.
PArcite virginea naevos in fronte Dianae Quaerere, qui radiis itis ad astra Sophi: Nobilis infami divam fuligine Censor Liberat, & vitio versa decora probat. Langrius, audaci subiens convexa volatu, Primus in illustri sidere castra facit, It foedae pertaesus humi quà sanguine nullo Lurida perspicuis ripa lavatur aquis. Surgite, mortales aegri, de faece maligna Terrarum, quas in frustra furor secuit, Et fratrum temeratus amor dulcedine praedae, Et malè mentitum publica jura nefas. Integra res alibi est. socias in regna tiaras Langrius & gratis & sine lite vocat. Exuat invidiam proles insana Philippi; Hic & Alexander quo satietur habet. Nondum sic veteres avias pulmone revello? Qui loquor haec, ingens ipse dynasta loquor. Sed loquor immeritus. Quid agis, clarissime Langri, Quâ me fronte Deos inter & astra locas? Excidis intentis, ingentibus excidis ausis; Impare congressu corruit iste labor. Tota nitet virgo, totius Cynthia Caeli Instar habet; quot ibi castra tot Astra facis. Tolle quod hic unum sordet: Quod Regibus addis Hugenium, malè; quod sideribus, macula est.
Cookies on Poetry Cove