In incendium Templi Novi Amstelodamensis, ex Italico meo, cujus est initium, Giunse fiamma sottil.
ILicet, incensum Templi laqueare piorum
Incensus toto Numine fregit Amor.
Pervasit tectum Pietas ardentior, arsit
Hinc paries, illinc dissiluere trabes.
Flammantes animae, quae vos amentia turbat?
Quae vos portenti sollicitudo novi,
Et cassus ratione dolor? reparabile damnum
Sentiit aethereis aestibus usta domus.
Flamma Deo placuit: coelesti fornice tectas
Qui voluit, fragilem destruit igne struem.
Sursum oculos, ubi mille micant illustria vobis
Sidera, mille, bonis fulmina fausta, faces.
Cui mundi convexa favent, quem gratia Coeli
Protegit, ingratè se neget ille tegi.