Ad eundem in suburbano, cum primam in voce parum produxisset.
Sylvestrem tenui musam meditatus avenâ
Nuper, ut in tenuem correpta est longa parentum
Ordine, longa gravi, claris natalibus, ortu
Syllaba, Grammaticae tandem sua damna rependis
Scilicet, & tenuis fortunae, stirpis egenae,
Progeniem, non grande parum, largè producis.
Mirer an invideam? invideo, dulcissime rerum,
Invideo, ut video quantùm tibi compede laxâ
Libertas, quae sera, tamen respexit inertem,
Ludere quae velles calamo permisit agresti.