In eundem.
HOrte, cultoris domini laborum
Culte digestor, redeatne rerum,
Sole declivi, satur à perenni
Fessus aratro:
Sive pallenti fugiente Fratrem
Cynthiâ coelo, libeat futuris
Denuò pectus benè praeparatum
Solvere curis:
Sive anhelanti Cane saevientiss,
Sive directum ferientis Astri
Suadeat sese rabies opacâ
Fronde retundi.
Horte, quae laudum series tuarum
Occupet vatem prior; unde quid sis,
Vnde quis post haec fueris, quis olim,
Dicere tentem?
Vidimus, cum, nec facie nec ortu
Nobilis, cum, nec segetis nec herbae
Dives, ingrati meritò subires
Crimen agelli:
Fortè Pisonum Fabiaeque pauper
Gentis assertor, modicâ superbum,
Caule succisâ, sterilis ferebas
Parte legumen:
Fortè te promo facili, penuque,
Foeta lactucis, fatuâve betâ,
Riserit majus nihil appetenti
Olla colono.
Nulla vicinae inferior paludis
Gloriae dos est:quotacumque digno
Terra virgulto caret, aut salubri
Pascua flore?