Ad universos.
HAEc ego de veris veri Praeconibus ore
Veraci vero proxima verba dedi.
Proxima cum dederim, quando propiora nequivi,
Immeritus verbis verba dedisse ferar,
Nescio quis palpum color aut pigmenta decerent;
Fallor, si didici fallere, primus ego.
Falsa facit semper mendacem fama poëtam:
Est ubi, qui possit fallere, nolle potest.
Non hìc me voluisse probas non false character:
Audiat hoc si cui fortè poëta vocor,
Audiat auditor tantorum quisque virorum,
Si sit Pastores fallere, nolle gregem.
Denique vos, grandes animae, vos, clare sacerque
Senio, sex nostrae sidera fixa rati,
Vos testor sine fraude piâ, sine laude malignâ
Εκ μυελοῦ ψυχῆς, qui loquor ista, loqui.
Si fallo, si fallo sciens, si subdolus autor
Parco vel hìc verum dicere, poena placet,
Poena placet noxae quâ non mage noxia, verum
Vos quoque de vitiis dicere nolle meis.