Monsieur;
IE ne suis pas glorieux à demy de me veoir au nombre de ceux que vos Muses ont abordé; Mais je croirois defectueuse la civilité aveq quoy j'ay taché de les recevoir, si vous qui les avez mises au monde si honnestes & si agreables, n'aviez vostre part de mes reverences, accompagnées d'autant de remerciemens que je les trouve parées de tout ce que la gentilesse d'un bel esprit a doctement inventé. Je ne me pourmene plus dans les rues de la Haye, que je n'en tienne quelcune par la main, voire en passant par devant celle où les honnestes gens ne sçauroyent aller sans se despouïller de leur honnestetè, & je ne regarde plus aucun edifice publiq, que je ne voye des ornemens mieux appropriez que tous ceux de l'Architecture. Je vous ay bien de l'obligation de ceste bonne compagnie, & vous asseure que je cheris extremement les filles d'un Pere, de qui je suis parfaictement,
Monsieur,
Tres-humble & tres affect. Serviteur
BRASSET.
A la Haye le 13. Iuillet 1644.