Ad Iacobum Gevartium Sen. Antv. à Secr.
In effigiem Cylindri glacialis, qualem paullo ante Antverpiani quidam vario post illum carmine ad miraculum elatum ad me miserant. Meae autem picturae inscriptio sic habebat.MIRA DE LENTE.
Horribile portentum
Hagae Com.
V. Kal. Febr.
procul omni industria
editum,
tota Hugeniorum Domus adspexit,
tota despexit.
cIɔ Iɔc xxiv.
TAle super tali surrexit marmore marmor,
Talis ab Hollando substitit unda gelu,
Hìc ubi candidulos inter, sua moenia, colles
Prospicit Arctoúm nobilis Haga solum.
En iterum, Atuatici, rapite in miracula stillas
Prodigii nobis non habitura locum.
Nil admirari prope res est una Batavos
Quae docuit temere nil timuisse viros.
Si tamen admotas elusit stiria prunas,
Si calidis algens ignibus arsit apex,
Qualis in AEtnaeo (capitis portenta, Brabanti?)
Mista nives didicit ferre favilla jugo,
Prosit aruspicium, constent sua fata cylindro;
Ilicet, & stupidi quod stupeamus erit.
Caetera nec pueri suspeximus. ERgo, Gevarti,
Te quoque tantillo diriguisse gelu!