In ejusdem cardinalis bibliothecam.
MIlle libros, & mille libros, & mille librorum
Millia magnifici publica Richelii
Cura, bono Patriae, capsis ingesta superbis
Nominis aeterni marmora viva locat.
Quòque voluminibus moles augusta coëmptis
Cresceret in titulos auctior usque suos,
Mille libros & mille libros & mille librorum
Jussit adimpleri millia mille libris.
Desine posteritas ἀπορεῖν quo se agmine facto
Duplicet in multam massa voluta nivem.
Materiam liquit vestris, qui scribitis, aequam
Viribus; omnis ubi Gallia sudet habet.
Scribite Richelium, partos pro Rege triumphos
Scribite & aeternis gesta legenda typis.
Mille libros impletura est quae posthuma famam
Unius capiet Bibliotheca viri.