Anders.
Geluckich is den man, die nae verdrietich draven,
Ten laetsten schip en goet bringt in behouwen haven.
Vlysses heeft seer lanck door ongeluck gedwaelt:
Mercurius in't laetst heeft hem wt rouw gehaelt.
Veel cloeke geesten oock seer dickwijls lange dolen,
Mits dat heur gaven groot geheelijck zijn verholen:
Maer noch in't laetst verwect hun Godt nae alle pijn
Een machtich man, den geen heur deuchden kenbaer zijn.
GElijck als iemant seer veel achten ende loven soude den mensch die hem nae grooten storm, onweder ende schipbreking tot goeder haven trock oft brocht: Alsoo oock, nae mijn goetduncken, wil den auteur van dit boecxken, bij dese sijne Devijs te kennen geven, hoe seer hij verwondert is, ende sich selven voor gheluckigh houdt, dat hij soo vriendelijck onthaelt ende ontfangen is geweest van den goeden Vorst Emanuel Filibert, Hertog van Savoyen.