Op de wijse: Boerinneken, als ghy sult water halen.
Coridon.
ACh my Diane!
Diana.
Wie roept my ane?
C.Ach t’is u slaef, die u comt smeken.
D.Wel Coridon, wat’s u clacht en ghebreken?
C.Een groote smert van min!
D.Leyt liefd u inden sin?
C.Och jae mijn Vrou, en bin
Gheheel ontsteken.
D.Ghy moet die uytten.
C.Iae waect van buyten.
D.Is die dan in u hert gheleghen?
C.Iae: want ick hebs al lang, al lang ghecregen
D.Liet ghy die soo voort gaen?
C.Ick cons niet weder-staen.
D.Soo ben ick seer belaen
Van uwent weghen
C.Och oft dat waer was!
D.t’Blijckt aen my clear ras.
C.Zijt ghy beweeght door medelijden?
D.Ia: want ghy claegt van smert en min by tijden.
C.Och wist ghy wat ick ly!
D.Wel wat ist? segghet my.
C.Och! t’is een slaverny
d’Ick niet can myden.
D.Ghy mocht vry warden.
C.Hoe? Doort vol-herden?
D.Neen: maer soo g’u van my wilt wachten.
C.Ach! sonder u mijn vrou, ic zoud versmachten!
D.Dat seghdy al ghelijck.
C.Ick ben tot tuygh, en blijck.
D.Maer naemdy eens de wijck,
t’Zou wel versachten.
C.Seer herdt salt vlieden.
D.Wilt voort bedieden.
C.Een jaghers pijl blieft in my steken!
D.Dat mach also (by u) niet zijn gheleken.
C.Iae, blief daer aen wel doot!
D.Maer ghy en hebt gheen noot.
C.Dats waer: maer soo ick vloot,
Daer wy af spreken.