Gaet op de voys: Van d’Enghelsche Mascurade. Of, vvy backten boeckvveijten coecken. etc.
Den Boer ontmoet// een Meysken soet// hier by der weghen, Dies den Boer docht// t’geen ic lang socht// comt my hier tegen. Den Boer terstont// goet zeeus goet ront// vryd t’meysken vaerdich: Maer t’meysken loer// weet met den boer// te spotten aerdich.
Boer. ICk bemin een soo soeten// dier, Soo vraeyen Venus kint: Ick hoop sy sal my moeten// hier, My dunckt ick siese gint. Weest seer ghegroet Moy meysken soet, Van die u meest bemint.
B. Schoon kint ick moet u vragen// wat: Hoe ver sult ghy noch gaen? Meysken. Iong man hoort mijn gewagen// plat, Daer en leyt u niet aen. B. Schoon kint waer deur Spreeckt ghy soo steur, Heb ick u yet misdaen?
B. t’Is om vrientschap te maken// goet, Dat ick by u blief staen. M. Ghy cont my niet vermaken// bloet, Ghy moecht wel verby gaen. B. Hoe sal ick toch Nu praten noch, Dat ick mach troost ontfaen?
B. Schoon kint wilt overlegghen// stil, Dat ick ben rijck en schoon. M. Ghy bent dat ick niet segghen// wil, Ick acht u niet een boon. B. Ay liefste laet Toch af dees praet,
En gheeft u dienaer loon.
B. Om dit verschil te slechten// moer, Laet ons wat sitten ne’er. M. Soo sat ick by een rechten// boer, Dat doen ick nummermeer. B. O neen mijn kint, V wel besint, Men noemt my een Lants-heer.
B. Want ick heb eyghen landen// veel, End’ oock veel beesten sterck. M. Iae, k’siet wel aen u handen// geel, Ghy doet veel beeste werck. B. Soet meyske bly, Ghy spot met my, Soo ick wel claerlijck merck.
B. Dies ick wel met versuchten// mach Van u nemen mijn keer. M. k’Wou dat ick u al vluchten// sach, En nummer comen weer. B. Wel adieu dan, Ick scheyder can, Men vinter oock wel meer.
Verkiest het Beste.
Cookies on Poetry Cove