Op de vooys: Galiard Itali.Oft, Mijn oogskens weenen, etc.
EEn bloemke sierich
Schoonder noyt gheene
Int t’hert alleene
Spant sy de Croon,
Dies ickse vierich
Bemin certeene
In s’werelts pleene,
Leeft gheen soo schoon.
Sy is van zeden,
En vraey manieren
Niet om versieren,
Als Pallas wijs
Gheeft sy oock reden
Seer goedertieren,
Al haer bestieren
Is seer propijs.
In t’aenschijn jeuchdich
Sietmen claer blincken
d’Oogkens die Wincken
Mijn hert tot haer.
Wou zy eens deuchdich
Mijn pijn ghedincken,
En my troost schincken
In’t lyden swaer:
Dan soud’ mijn suchten
En swaerlijck lyden
Seer haest verglyden,
En mijn hert souw
Met veel ghenuchten
Hem seer verblyden,
Tot allen tyden
Heel vry van rouw.
Prince.
Princesse goedich
Deughtsame vrouwe,
Wilt eens aenschouwe
Mijn groote pijn.
Comt laet my spoedich
Met Venus douwe,
Eer ick van rouwe
Gheheel verdwijn.
Verkiest het Beste.