Op de voys: Wt Vincken gaen. of, S’Morschens voor daeg, ect.
OM mijn playsier Ginck ick int velt spanseeren, Vry van dangier Maer tginck seer haest verkeeren: My moeten daer, Een Maeght eerbaer, Door wiens ghesicht en ooghen clear, Mijn Herte wert ontrust.
Seer vraey van ganck Was sy en wesen stadich. Haer Aenschijn blanck, Wees wt haer deucht wel-dadich: Dies ick in noot, Ben tot den doot, Want ick niet derf ontdecken bloot, Mijn Liefde die ick draegh.
Liefde raedt my Mijn noot haer t’openbaren, Sorgh als party Belet my sulck verclaren, En spreeckt seer vroet, Siet wat ghy doet, Want sy is schoon, en groot van goet, En ghy een slecht minnaer.
Hoope seer cranck Zijnde door Sorghe schadich, Neemt oock haer ganck Tot my, en spreeckt beradich, Waert dat sy wist, Vry onghemist, V liefde daer sy niet op gist, Ghy sout noch Troost ontfaen.
Als ick dan wil Den raedt van Hoope volgen, Soo is niet stil Sorghe maer soms verbolghen, En maeckt seer stout,
Mijn moet verflout, Dies mijn hert blijest vol druck benout, En weet niet wat bestaen.
Cupido Godt Tot u neem ick mijn vluchten: Hout niet voor spoodt Mijn droef en treurich suchten: Maer wilt suptijl, Toch metter ijl, Mijn lief door-schieten met u pijl, Op dat sy my oock mint.
En als u Boudt In haer herte sal steeken: Och! oft ghy wout My dan gheven een teeken! Waer door ick saen, Mochte verstaen, Dat ghy mijn beede hadt voldaen, Soo was mijn hert verlicht.
Dan sal ick cloeck Tot dese Maghet treden, Doen mijn versoeck Met begeerten en beden. En als sy dan, Mijn Trou neemt an, Soo sal icker niet scheyden van, Maer vast blyven Constant.
Dan sal gheen rou Mijn Herte meer doen vresen: Sy sal mijn Vrou En ick haer Dienaer wesen, En sullen voort, Met goedt accoort, In vreden leven onghestoort, Tot dat ons scheydt de Doot.
Verkiest het Beste.
Cookies on Poetry Cove