Op de wijse: Int hert ly ick van binnen// pijn.
OCh had ick eenen blye// moet, Maer eylaes fantacye// doet Mijn hert in swaer verdriet Leven, alsoo men siet. Elck een heeft zijn amye// soet, Die zijn melancolye// boet, Oft soo hem anders yet Over comt, oft gheschiet: Maer eylaes! niet ghebeuren En mach my sulck confoort, t’Welck mijn herte doet treuren, Mijn sinnen maeckt discoort. Gheheel onpast// aensiende vast Hoe dat des voghels veder// aert, En hoe ghestelt// is t’Vee op’t velt, Het is gheweder// paert.
Dus der blyden vreugt sterven// doet, Die alle solaes derven// moet, Wiens herte treurich mat Gaet dolen sdroefheyts pat. Eens meend’ ick wel verwerven// soet, Van haer in s’werelts erven// goet, Voor mijn druck, eenen schat: Maer t’refuseren, dat Ghetuychde wel haer vluchten, Als Daphne heel versteent, Niet achtende mijn suchten, My nu gheheel vercleent Op elck termijn// och! waer mach zijn Die my troost doen ghenieten// sal, Met haer eersaem// wesen bequaem, Voor mijn verdrieten// al.
Ymant die mochte vraghen// my, Waerom maeckt so veel claghen// ghy? En isser west noch oost, Voor u solaes noch troost? Hier op doe ick ghewaghen// vry, Daer ick com alle daghen// by, Is wel soet van propoost: Maer t’gaet my heel op’t boost, Als in Plutonis rijcke Tantalus leet onsoet: Soo quelt my oock ghelijcke Ghebreck, by overvloet. t’Is pijnnelijck// ooghschijnnelijck Te derven zijn vernoeghen// dan Is mijn cracht teer// t’is Godt den Heer Diet al wel voeghen// can.
O Princelijck royalich// Godt,
Gunt my toch een Godtsalich// lodt, Als ick hoop dat ghy sult Wt gracy menichfult. Ick wensch voor een fijnalich// slot, Om een die my loyalich// tot Mijns levens tijt vervult, By blieve met ghedult. Alle Cresi rijck-dommen, Macht, en staet pompeus, Of al wat men mach nommen Ter werelt precieus, Acht ick al cleyn// by een lief reyn, Minnelijck, en gratieus. Godt hoed my pleyn// voor een vileyn Quaet, en audatieus.
Niet sonder dat.
Cookies on Poetry Cove