t'Vermaeck der jeught

Op de wijse. Van, Galiarde Francisco.

WAerom valt my// Venus party, En weet ick niet certeyn, Door liefd ick stry// sonder beny Ten baet my groot noch cleyn. Cupido Goode// wilt my bystaen, Eer ick my doode// door quaed beraen.

O Aura soet// gheeft metter spoet, Dat my bewaeydt u wijn, Der minnen gloet// doet my onsoet Leven in droevich schijn, Om u sangwijnich// reyn roose root Word ick ghepijnicht// tot inden doot.

Maer noch gheen ent// waer ick my went, Ick lijde groot ghetreur, Hoe wel absent// sy is present Mijn hert tot aller ur. Al mist mijn ooghe// u bloeyend roos Int hert ghedooghen// lighdy altoos.

Onlancx by nacht// lach ick seer sacht Om u in droomen soet, k’Toonde mijn macht// door liefdens cracht, Die Venus had ghevoet, t’Cussen u monde// was mijn bedrijf Wt s’herten gronde// had ick gherijf.

Als ick bestont// t’cussen u mont Waert ghy met my bereet, Mijn hant oock vont// u borstjes ront Heymelijck en secreet, My doch te voelen// al swerelts vreucht My lust te coelen// door sulck gheneucht.

Maer doe’k aensach// den claren dach, En ick my vont alleen, Mijn hert dat lach// in swaer gheclach Vol druck en swaer gheween, Met tranich-douwe// mijn oogh door track By nae van rouwe// mijn hert te brack.

Och! mijn elent// en heeft gheen ent, Ick ben in druck altoos! V is bekent// mijn liefde jent, Noch blief ick troosteloos! O soet granate// reyn lieflick dier Comt my te bate// schoon Egelantier.

Dat ick eens mocht// soot herte docht Met u verkeeren vry, Soo was volbrocht// t’gheen ick versocht Door eerbaer liefde bly, Meer dan te cussen// u sucker mondt Mijn pijn sou blussen// tot aller stondt.

O maeghdelijck saet// reyn toeverlaet, Die u met hert en bloet, In liefd bystaet// doch niet afgaet Bid ick u met ootmoet: Maer wilt hem thoonen// der liefden aert, En Trou beloonen// oock onghespaert.

Cort mijn verdriet// eer het gheschiet Dat ick in desen strijdt, Ghelijck als Riet// vergae te niet, Gheeft liefd om liefd subijdt: Thoont my u jonste// Princes eerbaer Sonder afgonste// wt liefde claer.