2. Handelinge, 3. Verschoninge.
Liefde.
ICK die de Liefde ben seer vriendelick en goedich,
Vreedzamich van gemoet, van zinnen oock lanckmoedich,
Die niet lichtveerdich ben, maer eerelick my draech,
Die genen pracht en soeck, want nae geen wellust vraech,
Die niemant en bedriegh, die nimant en benyde,
Die niemant en verweck door twistinge ter stryde,
Die met verlangen hoop 'tgeen strecken mach tot nut,
Die alle dinck verdraech, die waerheyt onderstut,
Die om mijn eygen baet geen quaet en kan gedencken:
Maer lydende gedult den genen die mijn krencken,
Die mynen Naesten min, den Heer hoog boven al,
Nu langer in dit Lant geen plaets meer hebben sal:
Waer ick ga, waer ick sta, in wat plaets, in wat hoecken,
Die meeste twistigh zijn, dies sy my niet en soecken;
Waer sal ick lieve Godt in't eynd' belangen noch!