Op de Wyse: Als begint.
1.
WAerom ach! schoone eyst ghy van myn
t’Gheen dat ick u
Can nummer gheven,
Wilt ghy met loonemijn Liefste zijn,
Abra vernoecht
Is met met myn leven,
Helacy! Titer ach helacy!
Een ander stater in u gracy,
Abra ick sweer by myn vlocken neer
Dat Titer u bemint, en niemant anders meer.
2.
Waren u woorden
Waer Abra sou
Wayde met vreucht haer gauwe Schape,
Wilt ghy myn moorden
Doettet myn Vrou:
Titer dat segghen al de knape
Maer ick en soeck niet u te sterven,
Wat poocht ghy Abra dan te erven
Loon voor myn jonst, dien ick u heb ghetoont
Seght Abra waerme sal’t werde gheloont.
3.
Ween als ick ween
En claech als ick claech,
Doet als ick doe en lieft myn weder,
Ick sweer dat hier gheen // Vrouw hooch noch laech
Lieft dien ick oyt sal Minne werden,
Als u die met u schoone ooghen
Mijn eerbiedelijck sal ghebooghen,
Doen buyghen voort Outaer van u goedaerdicheyt,
Wat wilde ghy Abra meer ghebiede
Ick ben tot u dienst bereyt.
4.
Princelijcke Harder
Soeckt verder niet
Als van u weer bemint te werde,
Soeckt dan niet verder
Princes, want siet
Ick sweer u staech in Liefd’ te volherden,
Laet Abra dan van blytschap springhen
En tot lof van Titer singhen
Com Nimphje slecht der watere Harder schoon
Van laure blade bruyn en Bloempjes Croon.