C Na de wijse: Ick arm schaep aen de groen Heyde. O Heere Godt Almachtich En siet mijn sonden niet aen Wilt oock niet zijn ghedachtich Wat ick voor v hebbe misdaen Ick wil my nu bekeeren Tot v alleyn // een claer Fonteyn V waerheyt wil ick leeren. Ist dat ghy wilt aenmercken De boosheyt en misdaet En onse boose wercken So zijn wy desolaet Als ghy op ons wilt kijuen En gaet int recht // met uwen knecht Wie sal doch voor v blijuen. Eens wildick my verblijden In mijn ongherechticheyt Ick sochte in dien tijden Al mijn wellusticheyt In alles sonder maten De werelt bemint // haer goeden versint Heb ick // en daer op verlaten. Tot den stommen Afgoden Was ick oock heel ghekeert De welcke door menschen gheboden Oock seer waren vermeert Voor haer de knien gheboghen Haerlieden gheeert // van haer begheert Twelck sy niet en vermoghen. Ick sochte vanden blinden Dat ghesichte tontfaen Om dat leuen te vinden Ben ick totter doot ghegaen Op haer my heel verlaten Doch West oft Oost // heel onghetroost Moest ick gaen mijnder straten. Dus heb ick al mijn leuen Met grooter neersticheyt
Babilon seer verheuen En my tot haer verbreyt Ick sach op hare handen Haer mogentheyt // was heel verspreyt In Steden ende Landen. Ick aensach haer schoon wesen apo. 18, 16Ghepronckt en seer verchiert Met Gout, Peerlen in desen Costelijck ghestoffiert My docht al int aenschouwen Haer heylicheyt // haer eerbaerheyt Scheen bouen alle vrouwen. Dus was ick seer ontsteken Tot haer met liefde groot Ick en cost haer ghebreken Sien, noch haer schande bloot Maer doen ick my om wende Sach ick voorwaer // met ooghen claer Haer schande, en ellende. Doen wert ick van ghemoede Door vreese verslaghen heel Dat ick die schoone vloede Daermen put sonder zeel Aldus hadde verlaten Jere. 2, 10Ghegrauen een put // gheheel onnut Die gheen water conde vaten. Prince Godt ende Heere Wilt mijns ghenadich zijn Dat ick v hebbe dus seere Verlaten, O Schepper mijn Vwen Naem en lof verheuen De creatuer // en beelden puer Heb ick al toe gheschreuen.
Cookies on Poetry Cove