C Na de wijse: Wie sal ons dat lieue lange jaer, den Mey met vruechden singhen. ICk wil een liet beginnen hoort Mijn herte cant niet lijden Dat Godes edel ghebenedijde woort Misbruycket wort aen alle zijden. Ick roepe v O Hemelsche Vader aen Dus singhen sy alle gader Dronckaerts, hoeren en boeuen onbequaem Daer sy souden singhen helsche vader. Het een woort is singen en spreken van Godt Het ander is vloecken en sweeren By Christus doot, cruys, lijden, wonden root Dus gaet de werelt Godt eeren. Men scrijft, druct, leest, speelt, singet, vroech en laet Van Godt, men gaet hem oock ghieten Schilderen, backen, wtsteken om eygen baet Elck wil zijn cost van hem ghenieten. Om tijtcorting isset mede te doen Meest om ghewin, name ende fame Al lesen, spreken, singen sy van Gods Soon Het leuen blijft al onbequaeme. Een yeder zijn schalckheyt bedecken gaet Met Godes woort, so wy hooren Hoe oueruloedich de werelt leyt in quaet Sy meynen Gods ghenade is te vooren.
De werelt acht Christum als een rijcke sot Die zijn goet niet weet te regeren Daer elc mach af nemen so wat hem dient, int slot Sijn wercken wil niemant hanteren. De vreemde moghen wel afstaen Hy heeft wel kinders tot zijne goeden Die na haers Vaders wille hebben ghedaen Sy sullen v daer wel af hoeden. Ghy singet, maer huylen en weenen beter waer Ghy draghet een doode siele Ephe. 2, 11Ghy hebt gheen Godt, noch Christus openbaer Ephesien leset int tweede. Jon. 3, 5. Met Niniue treckt sacken aen Inder asschen doet oprechte boete Ge. 19, 24Wilt ghy niet met Sodoma vergaen So vallet den Heere te voete. Luc. 7, 38. Joan. 12, 3 Tot Christus voeten v begheeft Als Maria Magdalena dede Niet meer (O menschen) als te vooren leeft Beschreyt v sonden mede. Esa. 30, 1 Eccli. 7, 8. Gheen twee sonden te samen bint Onghestraft blijft daer niet eene mat. 18, 3Ghy moet v omkeeren als een cleyn kint Ende volghen Christum alleene. Wanneer v sonden als beschuldighers opstaen Teghen v in de laetste tijden O mensch wat hebt ghi v arme siele ghedaen Ghebracht in een sware lijden. Die dit Liet heeft voorghebracht Een yeder moet het wel hooren Had hy ghestoruen also onbedacht Hanskens Maertens had gheweest verloren.
Cookies on Poetry Cove