C Na de wijse: De Mey is nu in zijnen tijt. Oft: Vanden ouden Grijsaert. Eph. 5, 14STaet op die daer leyt versmacht Ende wilt v na Gods woorden keeren Luc. 21, 26Buert op v hooft, ende zijt verdacht Hoe dat v de Schriftuere gaet leeren Sy sal uwen Gheest veriubileren Ist dat ghy op Gods Beloften staet Hoort Christus Raet, en laet v informeren Want het is doch v eyghen baet. mat. 16, 26 Wat sout v baten, dit ouerlegt Als ghy ymmers van hier moet scheyen Al hadt ghy de werelt heel in subieckt Niemant en soude v willen gheleyen Als ghy van hier moet, ten baet geen schreyen So moet ghy laten des werelts iolijt Hier in weest verblijt, en laet v niet verleyen Want wy hebben vre noch tijt. Psa. 95, 8 Hebr. 3, 7. ende 4, 7. Hoort ghy heden des Heeren stem Wiltse doch met blijschap ontfanghen Veriolijst v hert, betrout op hem En loeft den Heer eph. 5, 19 Colo. 3, 16 met geestelijcke sanghen Wilt Gods woort met vruechden aenuangen Ende bekeert van v boos leuen fel Aenschouwet wel, wilt het vlees niet aenhanghen Oft ghy coemt in eeuwich ghequel. O mensch wilt toch nemen een keer En laet v vleesch toch zijn bedwonghen deu. 10, 16Besnijt v herte, na Christus Leer 1. pet. 2, 2 Jac. 4, 12.En laet af v achterclappighe tonghen
Daer ghy dus lange quaet me hebt gesongen Ro. 12, 2.Verandert v ghemoet, so doet ghy wel Weest niet rebel, leeft niet als quade honden 1. Tess. 5, 2De dach des Heeren die haest hem snel. Joan. 3, 3. Ten sy dat ghy nieu gheboren wert Ghy en moecht int Rijcke Gods niet wesen Al valtet v vleesch bitter en hert Esa. 51, 7. ende 12. mat. 10, 28 Luc. 12, 4Daerom en wilt nochtans niet vresen Wilt ghy wesen, van Godt ghepresen Keert vant oude, zijt nieuwe ghewent Door den geest geprent, al wat ghy dan gaet lesen Godt salt v wel maken bekent. De Gheest die sal v maken bekant Al wat v nut is om te weten Betrout op God, hy gheeft verstant Ende opent des Schrifts secreten Maer als ghy met lust des vleesch zijt beseten So en mach v zijn Gheest niet versaen Wilt dit verstaen, diet oude heeft versleten Die mach dat nieuwe vaten aen. Jaco. 1, 5. Hoort al die wijsheyt hebt ghebreck Bidt den Heer, hy sal v niet verlaten Die nu wort gheacht als een gheck En na gheroepen byder straten Verdraghet al ende laet haer praten mat. 5, 44. Luc. 6, 28En bidt voor de ghene die v versmaen Spiegelt v daer aen, hoe dat si Christum haten Die ons den wech is voren gegaen. 1. Pet. 4, 4 Het gheeft haer wonder, als Petrus seyt Dat ghy niet wandelt in hare weghen Sy meynen dat wy zijn verleyt Daerom weset doch niet versleghen Paulus verclaert ons oock te deghen Als die niet en weten, zijn wy gheacht Sijt daer op bedacht, 2. cor. 3, 5. hebben wy yet vercregen Ten is niet door ons eygen cracht. Gal. 6, 16 Beroemt v niet dan in Christus cruys 2. Ti. 3, 12Want alle Christenen moeten lijden Al ist ter werelt groot confuys
Wilt altijt v daer in verblijden Wilt daerom vanden wech niet schrijden Belieghen sy v, twert voor haer quaet Daer vast op staet, so Christus gaet belijden mat. 10, 22 ende 24, 9. mar. 13, 13Om mijnen Naem sult ghy wesen gehaet. Als ghy v van de werelt afsnijt So sullen de quade v beghecken De wereltsche menschen, so Christus belijt Sullen gramschap tegen v verwecken Wilt van haer boose weghen trecken Sy mogen niet lijden, somen beuint Sijt niet met haer ghesint Schout alle duyster vlecken Want Godt kent wel die hem bemint. Men siet warachtich met ooghen claer De gherechtighe inder noot baren Apo. 12, 8De roode Draeck, die neemtse waer Om haer vrucht seere te beswaren Maer God die canse wel bewaren Als sy haer vlucht neemt inde woestijn Al schiet hy zijn fenijn Met angst, hoort dit verclaren So baerde sy een kindekijn. Staet op ghy dochter van Israel 2. cor. 6, 17 apo. 18, 4En wijcket wt der Egypten landen Van afgoderij en boos opstel Sy moeten daer door blijuen in schanden Al verschueren sy met haer tanden Hebt gheen ghemeynschap met haer siet Haer naeckt verdriet Want haer valsch offerhanden Die en ghelden voor Godt al niet. Wilt ghy Godt kennen tot eenen Heer So behoort ghy al te schouwen Die anders vermaent dan Christus Leer Niet dan valscheyt sy hier bouwen Ten zijn niet dan grijpende wouwen Die v bedrieghen met haer waer Men sietse claer
2. Ti. 3, 6.Door Weduwen huysen snouwen Ende sy maken groot misbaer. Princelijcke Godt doet ons bystant Psal. 7, 2. ende 11, 2. ende 31, 2.Wy die alleen op v betrouwen Wy bidden voor onsen viant Dattet hem doch eens mach berouwen O Heer wilt doch haer hert bedouwen Dat bidden wy al met ootmoet O Vader soet Drijft wech haer valsch betrouwen Want het is haerder sielen goet.
Cookies on Poetry Cove