C Na de wijse: Met eenen droeuen sanghe. IN bitterheyt der sielen Claghe ick dit iammer groot Datmen dus siet vernielen Die Gods woort belijden bloot Veel hebben tHemels Broot Betaelt met bloede root Die Phariseeusche Fielen Brenghense meest ter doot. Een Broeder goet van natueren Heb ick na den Gheest ghehadt Die moeste den doot besueren Te Vueren binnen der stadt Godts woort beleet hy plat Daer hy gheuanghen sat Trijck Gods sal my ghebueren Want hy beloeft ons dat. Hoe sy my trecken en teesen En quellen met verdriet Esa. 51, 7. Jere. 1, 8. 4. esd. 15, 3 mat. 10, 26 Luc. 12, 4.En wilt daerom niet vreesen Die dat lichaem dooden siet Mijn siele, also Godt riet Daer aen en hebben sy niet Godt sal zijn arme Weesen Troosten wat haer gheschiet. Zijn Vrouwe die hy beminde Trooste hy met woorden soet Sy was beuaen met kinde Hy ureesde voor haer onspoet En sprack mijn vleesch mijn bloet En acht niet watmen my doet En ghy Gods Gheest versinde Het waer met v al goet. Aen al zijn Broeders tsamen Hy lieflijck oorlof nam Hy en wilde hem twoort niet schamen Als hy Tschauot op clam
Als een onnosel Lam Ootmoedich dat hy quam Maer de mat. 7, 15. Woluen die daer quamen Die bleuen al euen gram. Met seuen wreede slaghen Heeft hy de doot ontfaen Noch moestmen het hooft afsaghen Eer de martelerie was ghedaen Alle die dit saghen aen Die worden al eenen traen Hoe condy Godt verdraghen Die uwen Gheest dus wederstaen. Sijn arme beuruchte vrouwe Die maeckte groot misbaer Sy sterf van grooten rouwe Ende oock de vrucht met haer Dit bitter lijden swaer Mochtmen aenschouwen daer Heb. 10, 23O Godt ghy zijt ghetrouwe deu. 32, 35 eccli. 28, 7. Ro. 12, 19. heb. 10, 30Ghy wreket wel hier naer. Och Broeders wtuercoren Gen. 3, 4Dit doet Tserpents fenijn Sydy van Godt gheboren esa. 51, 7. Jere. 1, 8. 4. es. 15, 3. mat. 10, 28En vreest gheen sulck ghepijn Al toocht dat helsche Swijn Op ons een toornich schijn Twoort Godts moet al voren Met bloede beseghelt zijn. Al worden wy mispresen Vervolcht in deertsche dal En moeten een 1. cor. 4, 9 gaepspel wesen Ter werelt groot en smal Als Joan. 10, 3 schaepkens wt den stal Verstroyt zijn ouer al Godt sal ons wel ghenesen Alst hem believen sal. Broeders die twoort betuyghen Den vrede en tnieuwe ghebot En wilt gheen knien buyghen
Voor Baal den Afgodt 1. cor. 4, 9.Al zijn wy des werelts spot Gheheeten dwaes en sot Wilt troost in twoort Godts suyghen Dat bid ick v int slot.
Cookies on Poetry Cove