Op de wijse: Van den 16. Psalm.
V Wesens kracht beweeght mijn Ziel, o Heer!
V Gheest beroert mijn hert, om u te loven.
V Sons Magneet treckt mijn Ziel meer en meer;
V levend Licht laet lichten, Heer, van boven;
V soet ghevoel, laet dat mijn Gheest gevoelen;
V Hemelsch lust laet vreuchdigh in my woelen.
V wijsheyds macht regeert mijn Ziele stil;
V Hemels reuck doet haer nae u verlanghen;
V Hemels smaeck gheniet sy nae u will;
V Liefdens kracht komt haer geheel omvanghen;
V Aenschijns glants, u gracelijcke zede;
V soet ghesicht dat baert mijn Ziele vrede.
Daer is doch niet in Hemel noch op Aerdt,
Daer in mijn Ziel waerlijck vindt haer genoegen,
‘t Zy wat het zy, alst is van minder waerd’,
Sy kander in der waerheyd niet mee voeghen:
Haer oorspronck is uyt d’eeuwigh born ghekomen,
Sy rust niet eer, sy moeter weer in stromen.