Singt met aendacht. Vvilt my niet straffen Heere, Die misdaen heb so seere,
In eenen grammen sin, In uwen torn vervaerlijck, Castijt my niet so swaerlijck, Als ick wel weerdich bin. 2 Maer wilt u, Heer, ontfarmen, End over my erbarmen Ick ben seer swack altijt. Wilt my ghesontheyt gheven, Want mijn ziel end lijf beven, In desen mijnen strijt. 3 Mijn geeft hem oock ontstellet Swaer verschricken my quellet, Vreese maeckt my onvro. O Heere hooch ghepresen, Hoe langhe salt noch wesen Dat ick moet blijven so. 4 Ach wilt u tot my keeren, Wilt oock van my doch weeren Dees benautheyt niet cleyn. Seer groot sijn mijn misdaden, Maer uyt lauter ghenaden, Maeckt my Heer daer van reyn. 5 Want in de doot seer wreede Wie is die daer verbreede, V lof end eer bequame? Niemant sal in der hellen, Vwen prijs schoon vertellen, Noch dancken uwen naem. 6 Ick ben moed' end verslaghen, Van gantsch den nacht te claghen,
Ick doe swemmen voorwaer. Mijn bedde met mijn weenen, End mijn legher met eenen In mijn tranen eenpaer. 7 Mijn ghedaente met allen, Is nu, Heer, gantsch vervallen, Door gheduerich gheclach. Om dat aen allen zijden, mijn vyanden verblijden, Voor my met groot ghelach. 8 Ghy boose wilt nu wijcken Ghy wreede desghelijcken, Vertreckt nu haest van hier. God heeft mijn treurich claghen Na sijn goet welbehaghen Verhoort seer goedertier. 9 God en wilt niet verachten mijn ghebedt noch mijn clachten, maer hoort my tsijner eer. Mijn beden hem beweghen Ick heb van hem vercreghen, mijn begheerten end meer. 10 Daerom zijn nu met schanden, Beswaert al mijn vyanden Verbaest zijn sy ghewis. Te rugg moeten sy keeren met schaemten end oneeren, Want my God so goet is.
Cookies on Poetry Cove