Singt met aendacht.
Ghy kinderen die den Heer dient vry,
Looft end prijst sijnen naem bly
Laet de hoocheyt Gods zijn ghepresen
2 Laet seer heerlijck nu zijn verclaert,
Des Heeren naem seer wijt vermaert,
End eewichlijck voort verhoocht wesen.
3 Van der Sonnen opganck seer claer,
Tot den onderganck moet eenpaer
Ghelooft wesen uwen naem Heere,
4 Die over alle volcken wreet
Heerschen, end so wijt end so breet
Als den Hemel is, streckt sijn eere.
5 Wie is onsen Heere ghelijck,
Die in sijn Hemelsch Coninckrijck
So verheven is met eerweerde,
6 End van daer sijn ooghen af slaet,
Siende doet allesins toe gaet
In den Hemel end oock op d'eerde.
7 Hy heft seer fijn op uyt den stof,
De cleyne tot zijn eer end lof,
Wt den dreck verhoocht hy den armen,
8 Dat hy hem by den vorsten groot,
Ia by den vorsten sijns volcx bloot,
Verheffe na sijn groot ontfarmen.
9 T'huys des wijfs twelck was ondanckbaer
Gheeft hy vol kinderen eerbaer,
Die int huys spelen end op straten,
So dat d'onvruchtbare veracht,
Kindren ghewint met grooter macht
Dies sy verblijt wert boven maten.