Singt met aendacht.
Wie is die sal wonen eenpaer,
In u lieflijcke Tenten Heere?
Wie sal doch verkeeren hier naer,
Door u goetheyt sonder ghevaer,
Op uwen heylighen berch met eere.
2 Het sal wesen die mensch eerbaer,
Die steets wel doet in allen dinghen
End recht handelt int openbaer,
Wiens mont dat oprecht is end waer,
Ghestadelijcken sal voortbringhen.
3 Die gheen achterclap spreeckt onvroet,
Tot sijnes naestens smaet en schande
Die teghen hem oock niet misdoet
Noch mishandelt: maer hem behoet
Voor oneeren menigherhande.
4 Die oock den Godloosen niet en acht
End daer toe eerst tot allen stonden,
Hem die den Heer vreest met aendacht,
Die sijn beloften heeft volbracht,
Al waren oock sijn schade bevonden.
5 Die tot woecker niet gheeft sijn ghelt
End gheen gaven oyt heeft ghepresen,
Om t'recht des vrouwen met ghewelt
Te breecken, die so is ghestelt,
Sal voorwaer ghelucksalich wesen