Refereyn op de Uraghe.
Godt schiep den mensche, soot is ghebleecken wel. Van slijm der aerden met eenen lustighen Gheest cloeck. Maer so hy zijn Ghebodt niet en onderhiel snel So heeft hy seer fel met een swaer ghequel Hem tot verdriet oock ghestelt eenen vloeck Nochtans den mensche vindende der fortuynen boeck En zijn vrijen wille in als te pracktiseren Die werelt te doorsoecken in allen hoeck So heeft den mensche doorsien sonder cesseren Alle constighe pracktijcke zijnder gheneren Hoe wel swaerheyt hem dickwils quam betrapen So heeft hy tot zijnen baten en beste beweren Nae het alderbeste ende schoonse gout gaen raepen Waer door hy mochte bouwluyden ende knapen Crijghen seer wel tot zijnen wercx oorconden Ende oock te coopen Paerden, Coyen, Ossen, Schapen Het fijn goudt swaer ist, best door smenschen verstant gheuonden
Wat isser ter werelt beter naer smenschen sin Ofte behouftigher tot zijn sleuens verstercken Als gout dat swaerder is dan eenich loot ofte tin Noch siluer metael coper ijser tzy dick ofte din Tgout moetmen in alles swaerder bemercken Voort ist dierbaerste daer den mensch meest naer gaet hercken In alle perijckel Zeevaert Oostersche oft spaensche reysen Oock Capiteynen Vaendrichs groote meesters oft clercken In swaren noot gaense haer dickwils verstercken Al moetense deur doots stoot dick achterdeysen Nochtanh om gout ist meest datse gaen peysen Om dat te crijghen met groote swaerheyt in haer ghewelt Veel constighe gheleerden in schoonen schijn haer veysen Waer deur met swaerheyt haeren sin werdt oock ghequelt Hoe menich werter wt den sadel en waghen gheuelt Tis al om tgout ghedaen om vreuchts vermonden Ist arm, rijck, allen menschen zijnder toe ghestelt Het fijn goudt swaer ist, best deur smenschen verstant gheuonden.
Keyserlicke Conincks croonen zijnder van ghemaeckt Haer gouden Chepters schoon int aenschouwen Dierbaere goude ringhen voor vrouwen onghelaeckt Goude spanselen oorringhen seer wel ghestaeckt Het maeckt een vreucht in allemans ontfouwen Diet oock sal vercrijghen tis deur groot benouwen Als deurt houwen instortinghe vande mijne swaer Iae deur oueruallen van watren en swaer bedouwen Ende oock t'aenschouwen van Aertgheesten eenpaer Die den arbeyders aenbrenghen menighen grooten vaer So dat sy van vreesen dickmaels moeten loopen Sy bewarent so swaerlick voor ende naer En hebbent dickwils legghen met grooten hoopen Oock isser menich mensch die zijn leuen daer om coopen Die anders souden steruen deur clachtighe gronden Daerom beschermt het den mensch voor des doots noopen Het fijn goudt swaer ist, best deur smenschen verstant gheuonden.
Prince. Prince so wie gout heeft houtmen in eeren Het sy gheestelick, waerlick hoe sy zijn ghesint Het doet staet voeren Coninghen vorsten en Heeren Het doet den onuerstandighen groote const leeren Vreucht mach hy vermeeren dies hem onderwint Ende hem also vast int arbeyden bint So valt hem wel tbeste in swerelts pryeel Wel is hy vaerende die den draet also spint Want tgout is tswaerste te crijghen tot zijnen deel Maer het is tbeste en eerlickste int half of heel Want Christus ons salichmaecker werder me versocht Als hem gout werde gheoffert sonder crackeel Oock ist gout voorwaer der medicijnen vrient bedocht Ende int puereren wert met swaerheyt ghewrocht Wy wt iolijt vanden dorren spreecken noch ten stonden En Rapen gheneucht door ons constighe tocht Het fijn goudt swaer ist, best deur smenschen verstant gheuonden.
Cookies on Poetry Cove