T'bewijs opten Intrede vande Camer van Rotterdam.
Ghelijck Iudas Machabeus door Godts ghenaden Als een Vorst der Iooden, en een strijtbaer helt Met t'swaert Apollonius door veel vroome daden Den Iooden door Godts arm in vrijheyt heeft gestelt So presenteren wy v nu alhier int velt Een Iudas Machabeus soo ghy moecht aenschouwen Strijdende voor tgheloof en tvaderlandt met ghewelt Door bistandighe trouvve diemen hem siet houwen En liefde des Vaderlandts die hem sonder vercouwen Van vierighe liefde met vlijticheyt prickt Om doude vrijheyt weder int lant te bouwen Die Mars noch daghelicx soect tonder te brouwen Mer tis quaet te vvederstaen dat Godt heeft gheschict.
Nu doude vrijheyt zijnde ingheleyt Vanden lant beschermer voor ghenomineert Door liefde des Vaderlandts en gherechticheyt Met haer oude priuilegie die elcx begheert So coemt Lust tot const die deloquency leert Leunende op zijn staf Redelickheyt ghenaempt En brenckt Rhetorica voort die nu floreert Met den bandt van Eendracht deuchdelick befaemt Niet achtende datter veel zijn dient seer graemt Want so daer douwe Vrijheyt is, laets' hem ghenieten Hy betrout op zijnen staf alsoot wel betaemt Haer met Eendracht inleydende sonder schaemt VVant vrijheyt bedvvinghen mach gheen vryheyt hieten.
Nu coomt Mars vveder die hier is verdreuen Van Iudas Machabeus hier voor verhaelt Willende van verre met Fortse benemen tleuen Dees voorgaende persoonen daer hy seer op smaelt Om Opinie in te vueren onghefaelt Met een obstinaet hert en groot onverstandt Waer naer tyrannije en verraet seer taelt Om weder te regneren alsvooren int lant Dees volghen achter aen om te breken den bant Met Moort en bedroch van gherechtighe eendracht Hoe wel d'opinie van vele wert gheboon de hant Sy connen niet wtrichten by reden want Discordia moet vergaen en accoort maect macht.
Prince. Princelicke auditeurs let vvel opt besluyt Vanden sin onser intrede soo ghy moecht mercken Hoe Iudas Machabeus zijn Excellenty beduyt Waer door Godt als een Instrument heeft willen wercken Om ons weder tot de oude vrijheyt te stercken Die wy nu eensdeels Godt sy lof hebben vercreghen Waer door de const van Rhetorica ontdoet haer vlercken Dien sommighe opinioese seer staen teghen Die Mars daer toe verwect om twist te pleghen Maer wy hoopen sy sullense niet verwinnen Oock door tyrannye noch verraet beweghen Dits dintentie verstatet ter deghen Der blauvve Acoleykens die versaemt zijn met minnen.
Met minnen versaemt. Lieft baert vrede, per Yselueer.
Cookies on Poetry Cove