Refereynen ghepronunchieert opte intreden binnen der stede van Delft

Refereyn op den Reghel.

Ieremias Cap. 7. ver. 4. 5. etc.O Mensch, ghy die dan Naem Christi gaet belijden Ghy Christenen, seg ick, van wat staet ghy zijt Tsy ghy v, deur pronc en pracht, met fluweel of zijden Off met lappen gaet becleeden t'deser tijt

Betert doch v leuen en wesen, op dat ghy met vlijt D'een d'ander niet veronghelijckt, ofte te cort doet Voor de gherechticheyt der weduwen en weesen strijt Hout v handen suyuer van tvergieten t'onschuldich bloet Schout valsche leer, afgoden dienst metter spoet Van dieuery, roof, brant en feyten moordadich Laet ouerspel, gulsicheyt, oncuysheyt, so ghy zijt vroet, En van alle ontucht, wilt v onthouden stadich Dit doende wil v Godt zijn ghenadich Anders sal hy v, als hy Silo ghedaen heeft euen, Ontsteecken met gramschap onuersadich, Verdelghen: om v sonden dien ghy hebt misdreuen Want Godt haet den menschen die booslick leuen.