Refereynen ghepronunchieert opte intreden binnen der stede van Delft

Refereyn.

So haest den mensch hadde ouerghetreden Door onachtsaemheden, en eyghen verstant Tghebodt des Heeren, is hy besteden Vande handt Gods in zijn eyghen leden Waer door hy met reden bekende zijn schandt Welcke ouertredinghe wy tot een doodtlick pandt Als metter handt, van ons voorouders hebben gheerft En so wijt ghebruycken soot in ons is gheplant Godt haet ons want die sondicht diens ziel die sterft Naedien hy viandt alder sonden is, dien hy bederft En haer van hem kerft diese beminnen So laetse ons verwerpen, eer elck verwerft Die in sonden swerft, die doot in hem binnen Want die Godtloose sullen vergaen en niet ontrinnen Godts oordeel, maer beginnen, daer voor te beuen Dus bekeert v in tijts wilt v vleysch verwinnen Want Godt haet den menschen die booslick leuen.