§ Liedeken op de wijse, Ghy die verlast zijt compt tot my. &c.
GHy Christen Broeders ouer al, Hoort Christum den Heere spreken, Die wel naervolcht mijn weghen smal, De Duysternis is hy ontweken, Dus Liefde draecht Die my behaecht, Soo en werdt ghy niet versteken.
Liefde is een deucht die wel vermach, Haer deucht en machmen niet vol louen Ghelijck de Sonne verlicht den dach, Soo blincken haer wercken hier bouen: Der Sonden ban Sy breken can, Sy vaecht die zijn bestouen.
Ghy die int herte Liefde prent, Scientie wert v ghegheuen, Als een met Godt werdt ghy bekent, Soo Mattheus heeft beschreuen, Christus is t'Hoot, Ghy d'lichaem bloot, Alle die in Liefden leuen.
De Liefde reen is soo eerbaer, Gheen last en can haer verdrieten, Sy helpt die zijn beladen swaer, Men siet haer in noot niet verschieten, Zijt ghy bedroeft, Ghy werdt ghetoeft, Liefde doet sulcx ghenieten.
Paulus die seydt met woorden vroet, Al spraeck ick met Menschen tonghen, Oft oock met Enghelen voyse soet, En met Liefden niet waer bedwonghen Uoor Godts Aenschijn, T'waer swaer ghepijn, Alsoo hier werdt ghesonghen.
De selue die spreeckt noch hier by, Al deeld' ick mijn goet den Ermen, En gaef mijn Lichaem met herten bly Ten brande sonder ontfermen, Seer cleen ghewin Brocht my dit in, Oft Liefde moest mijn hert verwermen.
Die niet met Liefden is ghewont, En mach nemmermeer gheraken Tot der gherechter ghesontheyt gront, Dwelck Christus is, soo wy smaken, Die t'alder tijt, Om ons bevrijt In Liefden wilt dat wy waken.
Cookies on Poetry Cove