Amor vincit. Per Aelst. Michiel Concken. D'Betrouwen is al.
D'Alderbeste Haue, ende Ghifte volmaeckt, Compt wel gheraeckt // van bouen nederdalende Uanden Uader der Lichten, het verstant wel smaeckt, Tot gheen veranderinghe, wort hy gheoorsaeckt: Want vrijwillichlijck, is hy ons voorthalende, Deur dwoort der Waerheyt, die daer waren dwalende, Ghemaeckt eerstelinghen, sijns Schepsels vercoren, Int t'hooren des Woorts soo en zijt niet falende, Zijt doenders des werckx, wilt altijt recht orboren, In Godtdiensticheyt, maer laet v commen voren Te bedwinghen v Tonghe, zijt traech int spreken, In Gramschepen soo en wilt v niet verstoren: Want Gramschap eens mans die en wort niet verleken Byder Rechtveerdicheyt Gods, dus vliet ghebreken, Ontfangt den suyueren Godts-dienst, hoort die bede Der Weesen, Weduwen, wilt die Hant wtsteken, T'Bermhertich religieus Recht, is s'Lants Urede.
Broeders (seydt Iacobus, in tweede voorwaer) En wilt t'Ghelooue vander Glory ons Heeren Niet bringhen in d'Wtnemen der Persoonen daer
In uwe Collegie, een Man compt naer, Zeer pompeuselijck, en tot sijnen vermeeren, Hebbende eenen gulden Rinck, blinckende Cleeren, Oock commende een Erm Mensch van cleeren bloot, En dat ghy aenmerckende, v dan wilt keeren Tot den Rijcken ghecleeden, in een soet exploot, Seght, Sidt ghy hier wel: maer den Ermen mensch als snoot, Staet ghy daer, oft sidt op die nedere Bancken: Oordeelt ghy niet by v seluen, diet soo gheboot, En zijt gheworden Rechters van quade rancken: Doet Recht den Weesen, en den Ermen crancken, Ghelijck den Rijcken, wie daer teghen strede, En aenhoort niet der hoogher lieden bedancken, T'Bermhertich religieus Recht, is s'Lants Urede.
Hoort (spreect hy) alderliefste Broeders ghepresen, En heeft Godt den Ermen mensche vercoren niet? Rijck int t'Ghelooue, een Erfghenaem te wesen Des Rijckx, deur Beloftenisse wtghelesen, Den ghenen die hem lief hebben: maer soomen siet, Den Ermen mensch wort onteert, en blijft int verdriet: Uerdrucken v die Rijcke niet, deur Machticheyt? Blasphemie in uwen goeden Name gheschiet, In tbetrecken voor Uerscharen, met Crachticheyt, Eest oock dat ghy vrijlijck, inder Warachticheyt Die Conincklijcke Wet volbringht, na schriftueren, Hebt lief uwen Naesten, in v Uoordachticheyt, Soo doedy wel: maer wie dat hem nu wilt rueren Wtnemer der Persoonen te auentueren, Diet doet Quaet, en sonder Bermhertichede,
Soo sal sy oock ghelijck Uonnisse besueren, T'Bermhertich religieus Recht, is s'Lants Urede.
Cookies on Poetry Cove