§ Prince.
Prince dinckt op Salomon met rijpen sinne,
Soo lang hy wijs was tot sijnen ghewinne,
Pays en minne // groeyden zeere in sijn Lant,
Doen groeyder oock Ruste inden beghinne,
En souder bleuen hebben als Keyserinne,
Ia, als een Goddinne // met allen triumphant:
Hadde Salomon niet verkeert sijn wijs verstant,
Aen elcken cant // hadde tslandts welvaert ghebleken:
Maer Wijsheyt failgerende wert Onrust gheplant,
Gheheel deur sijn Lant // nae des Bybels spreken.
Roboam insghelijcx wert oock versteken
Midts faute van Wijsheyt, dits claer beuonden,
Tmeeste deel sijns Uolcx is van hem gheweken:
Dit wrachte sijn Dwaesheyt, na t'schrifts orconden,
Nu Godt is de Wijsheyt tot elcken stonden,
Inde Wijsheyt den prijs leyt, nae elcx aenschouwen,
De Wijsheyt can de Landen in Ruste houwen.